Wednesday, 30 December 2009

ஸ்னாட்ச் [Snatch] - எனது பார்வையில்

ஜில்லென்று ஒரு சொம்பு தண்ணீர் குடித்து விட்டு மூச்சை நன்றாக உள்ளே இழுத்துக் கொண்டு கீழ் கண்ட பத்தியைப் படிக்கவும்.

பெல்ஜியத்தில் இருந்து கோல்ப் பந்தளவு உள்ள ஒரு வைரத்தைக் கடத்தும் ஃப்ரான்கி (Frankie "Four Finger") என்ற கொள்ளைக்காரன் அமெரிக்காவில் உள்ள அவி (Cousin Avi) என்பவனிடம் அந்த வைரத்தை விற்கும் முயற்சியின் ஒரு கட்டமாக டோக் (Doug[las]) எனும் வைர வியாபாரியை சந்திக்க லண்டன் வந்திருப்பதை அறிந்து கொள்ளும் ரஷிய / உக்ரைனிய ஆயுத வியாபாரியான போரிஸ் (Boris The Blade) அந்த வைரத்தை ஃப்ரான்கியிடம் இருந்துக் கைப்பற்ற சாலமன், வின்சென்ட் என்ற இரு ஆப்பிரிக்கர்களை நியமிக்க, அவர்கள் டைரோன் (Tyrone) என்ற மற்றொருவனுடன் சேர்ந்து அந்த வைரத்தை அபகரிக்கும் போது ஒரு சூதாட்ட விடுதியை தாக்க, அதனால் ஆத்திரமடையும் அந்த சூதாட்ட குழுவின் தலைவனான பிரிக் டாப் (Brick Top) சாலமன், வின்சென்ட் மற்றும் டைரோனை மடக்க, அவர்கள் மூவரும் பிரிக் டாப்பிடம் இருந்து தப்பிப்பதற்காக தற்போது போரிஸிடம் இருக்கும் வைரத்தை பிரிக் டாப்பிடம் ஒப்படைப்பதாக கூறி அதற்கான முயற்சியில் இறங்க, இதற்கிடையில் இந்த குழப்படியைப் பற்றி தெரிந்து கொள்ளும் அவியும் லண்டன் வந்து டோனி (Bullet Tooth Tony), ரோஸ்பட் (Rosebud) என்ற தாதாக்களின் உதவியோடு அந்த வைரத்தை துரத்த...

அடடா மூச்சை விட்டு விட்டீர்களே. ஜில்லென்று இன்னொரு சொம்பு தண்ணீர் குடித்து விட்டு மூச்சை நன்றாக உள்ளே இழுத்துக் கொண்டு மேலே உள்ள பத்தியைப் மீண்டும் படிக்கவும்.

என்ன முடியவில்லையா? ஒரே குழப்பமாக இருக்கிறதா? பாதகமில்லை. வேறு ஒரு கதை சொல்கிறேன்.

லண்டனில் சட்டவிரோதமாக நடக்கும் குத்துச்சண்டைகளின் ப்ரமோட்டர்களில் ஒருவன் டர்க்கிஷ் (Turkish). அவன் ஐரிஷ் நாடோடிக் கும்பலை சேர்ந்த மைக்கி (Mickey) என்பவனிடம் இருந்து ஒரு வாகனம் வாங்க முயற்சித்து மைக்கி மற்றும் மைக்கியின் சகாக்களால் ஏமாற்றப்படுகிறான். பின்விளைவாக ஏற்படும் சர்ச்சைகளில் டர்கிஷ் தனது குத்துச்சண்டை வீரர்களில் ஒருவனான ஜார்ஜை இழக்க நேரிடுகிறது. அடுத்த போட்டியில் சண்டையிட யாரும் இல்லாததால் ஜார்ஜை வீழ்த்திய மைக்கியையே அந்தப் போட்டியில் சண்டையிட செய்கிறான் டர்க்கிஷ். அதில் எதிர்பாராதவிதமாக மைக்கி வெற்றி பெற, அந்தப் போட்டியை வைத்து சூதாட்டம் செய்த பிரிக் டாப் பெருத்த நஷ்டம் அடைகிறான். இதனால் ஆத்திரமடையும் பிரிக் டாப் டர்க்கிஷையும் மைக்கியையும் மிரட்டி அடுத்த போட்டியில் சொன்னபடி ஒழுங்காக (!) சண்டையிடா விட்டால் அவர்களை கொன்று விடுவதாக மிரட்டுகிறான். இதனிடையே பிரிக் டாப் நடத்தும் சூதாட்ட விடுதி சில ரவுடிகளால் தாக்கப்பட, அவர்களைத் தேடி கிளம்புகிறான்.

என்னடா, சம்பந்தமே இல்லாமல் இரண்டு கதை சொல்கிறான் என்று நினைக்க வேண்டாம். இது இரண்டுமே Snatch திரைப்படத்தில் வருவது தான். மேலே உள்ள இரு பத்திகளில் வரும் 'பிரிக் டாப்' கதாபாத்திரம் தான் இந்த இரு கதைகளையும் இணைக்கும் (பெரும்) புள்ளி. மறுபடியும் ஒரு முறை படித்துப் பாருங்கள் புரிந்தாலும் புரியலாம்! அப்படியும் புரியவில்லை என்றால் Snatch திரைப்படத்தை பார்த்து விடுங்கள். தெளிவாக புரியும்.

சில படங்கள் மட்டுமே நம்மை மறுபடி பார்க்கச் செய்யும். இந்தப் படத்தை டிவிடியில் பார்த்து முடித்த உடனேயே மறுபடி ஆரம்பத்தில் இருந்து பார்க்கத் தொடங்கினேன். அந்த அளவிற்கு சமீபத்தில் ரசித்துப் பார்த்த படம் இது. ஏராளமான கதாபாத்திரங்கள், சின்ன சின்ன ஷாட்டுகள், விறுவிறு திரைக்கதை, அள்ளித் தெளித்த நகைச்சுவை என்ற சரியான மசாலா தான் Snatch.

மகாபாரதம் ரேஞ்சுக்கு கதாபாத்திரங்கள் இருந்தாலும், ஒருவர் விடாமல் அனைவரும் தனிப்பட்டு தெரிகிறார்கள். குறிப்பாக

ஃப்ரான்கி: Usual Suspects, Sin City போன்ற படங்களில் கலக்கிய டெல் டோரோ (Del Toro) இந்தப் படத்தில் ஃப்ரான்கி. சிறிது நேரமே வந்தாலும், ஸ்டைலுக்கு குறைவில்லை. சூதாட்ட மோகத்தில் விரல், உயிர், கை என அனைத்தையும் இழக்கும் கேரக்டர்.

கஸின் அவி: பார்க்க பெரியப்பா போன்ற தோற்றம். வைரம் கையை விட்டு போகாமல் இருக்க நியூயார்க் - லண்டன் டிரிப் அடித்து டென்ஷனாகும் பார்ட்டி.

ப்ரிக் டாப்: சூதாட்டம் நடத்தும் 'பயங்கர'வாதி. சடலங்களை எப்படி பன்றிகளின் உதவியோடு அப்புறப்படுத்துவது என்று ட்யூஷன் எடுக்கும் காட்சியில் ஏ-க்ளாஸ் டெலிவரி.

சால், வின்னி, டைரோன்: சின்ன சின்ன வசனங்கள் பேசினாலும், அத்தனையும் அபார நகைச்சுவை. முக்கியமாக டைரேனின் அப்பாவித்தனமான முக பாவனை ஆஹா!

மைக்கி: ஐரிஷ் நாடோடியாக, புரியாத ஆங்கிலம் (ஆங்கிலம் தானா அது?) பேசி கலக்கி இருப்பவர் பிராட் பிட். அனாசியமான நடிப்பு!

டர்க்கிஷ் & டாமி: ப்ரிக் டாப்பின் சிலந்தி வலையில் சிக்கி நொந்து நூலாகும் கேரக்டரில் டர்க்கிஷ் மற்றும் அவன் சகா டாமி.

இவர்களைத் தவிர படத்தில் ஒரு காட்சியில் மட்டுமே வரும் சமையல்காரன் சாசேஜ் சார்லி, சூதாட்ட விடுதியில் புக்கி (bookie) வேலை பார்க்கும் பெண் போன்ற சின்னஞ்சிறு பாத்திரங்கள் கூட மனதில் நிற்கிறார்கள். முக்கியமாக அந்த பெண் புக்கி பேசுவது ஐந்து வரிகள் தான் என்றாலும் அழகோ அழகு (யூடுயூபில் பார்க்க).

இந்தப் படத்தை இயக்கியவர் பாடகி மடோனாவின் முன்னாள் கணவரான Guy Ritchie. இந்தப் படம் "Lock, Stock and Two Smoking Barrels" என்ற மற்றொரு படத்தின் அப்பட்டமான காப்பியாம். இதில் கூத்து என்னவென்றால் "Lock, Stock and Two Smoking Barrels" படத்தை இயக்கியவரும் Guy Ritchie தான் (நம்மூர் இயக்குனர் கதிர் ஞாபகம் வருகிறதா?).

துக்கடா: இக்கதையில் வரும் கதாபாத்திரங்கள் அனைவரும் பலதரப்பட்ட இனத்தை சேர்ந்தவர்களாக வருவது இப்படத்தின் முக்கிய அம்சமாகும். இது படம் முழுவதும் நேரடியாகவோ மறைமுகமாகவோ உணர்த்தப்பட்டுக் கொண்டே இருக்கிறது. அமெரிக்கர்கள், ஆங்கிலேயர்கள், ஆப்பிரிக்கர்கள், உக்ரைனியர்கள், ரஷியர்கள், ஐரிஷ்காரர்கள், யூதர்கள் என அனைவரும் வருகிறார்கள்.

இந்தியர்கள்? ஓ யெஸ் இருக்கிறார்களே! என்ன கேரக்டரா? அதுக்கு படம் பாருங்க :)

Monday, 5 October 2009

டிஸ்ட்ரிக்ட்-9 - எனது பார்வையில்


படம் வந்து சில மாதங்கள் ஆகி விட்டதாலும், ஏற்கனவே பலர் இப்படத்தைப் பற்றி எழுதிவிட்ட காரணத்தாலும் பெரிய பில்ட்-அப் எல்லாம் கொடுக்காமல் நேராக கதைக்கு போகலாம்.

1982ஆம் ஆண்டு தென்னாப்பிரிக்காவின் முக்கிய நகரான ஜோகனஸ்பர்க் மேல் ஒரு வேற்றுக்கிரக விண்கலம் பழுதடைந்து நிற்கிறது. விண்கலத்தின் உள்ளே போய் பார்த்தால் நொந்து நூடுல்ஸாகி இத்துப்போன இடியாப்பம் போன்ற நிலையில் வேற்றுக்கிரகவாசிகள் (செல்லமாக இறால்கள்). அரசு இந்த இறால்களை வறுவல் செய்து சாப்பிடாமல் டிஸ்ட்ரிக்ட்-9 (District-9) என்ற பெயரில் ஒரு முகாம் அமைத்து சமத்து பிள்ளைகளாக இருக்கச் சொல்கிறது.

2010ஆம் ஆண்டு. டிஸ்ட்ரிக்ட்-9இல் குடியேறிய வேற்றுக்கிரகவாசிகள் குடியும் குடித்தனமுமாக வாழ, முகாமின் ஜனத்தொகை கிட்டத்தட்ட 20 இலட்சத்தைத் தொடுகிறது. ஜனத்தொகைப் பெருக்கத்துடன் குற்றங்களும் பெருகி, நிலைமை மிகவும் சீர்கெட்ட நிலையில் இருக்க, ஜோகனஸ்பர்க் மக்கள் பொருத்தது போதும் என பொங்கியெழுகின்றனர். அரசாங்கம் வேற்றுக்கிரகவாசிகளுக்காக புதிய முகாமொன்றை ஊரை விட்டு வெகு தொலைவு தள்ளி அமைக்கிறது. புதிய முகாமின் பெயர் டிஸ்ட்ரிக்ட்-10.

வேற்றுக்கிரகவாசிகளை டிஸ்ட்ரிக்ட்-9இல் இருந்து டிஸ்ட்ரிக்ட்-10க்கு மாற்றும் பொறுப்பு MNU என்ற தனியார் இராணுவத்திடம் ஒப்படைக்கப்படுகின்றது. விக்கூஸ் என்ற MNU நிறுவன அதிகாரி இந்தப் பணிக்கு தலைவராக அறிவிக்கப்படுகிறார். இடமாற்றப் பணியின் முதல் படியாக டிஸ்ட்ரிக்ட்-9இல் இருக்கும் அனைத்து வேற்றுக்கிரகவாசிகளுக்கும் வெளியேற்ற உத்தரவு அறிக்கை (Eviction notice) அளிக்கப் போகும் விக்கூஸ் மேல் எதிர்பாராதவிதமாக ஏதோ ஒரு திரவத்தின் சில துளிகள் படுகிறது. இதன் விளைவாக அவர் வேற்றுக்கிரகவாசிகளைப் போல உருமாற ஆரம்பிக்கிறார். இலவச இணைப்பாக வேற்றுக்கிரகவாசிகளின் ஆயுதங்களைக் கையாளும் திறனையும் பெறுகிறார். இந்த ஆயுதங்களை சாதாரண மனிதர்களால் இயக்க முடிவதில்லை - வேற்றுக்கிரகவாசிகளின் மரபணு (DNA)) கொண்டவர்களுக்கு மட்டுமே இந்த ஆயுதங்கள் கட்டுப்படுகின்றன. விக்கூஸின் இந்தப் புதிய திறனைக் கண்டறியும் MNU, விக்கூஸைக் கொன்று கொத்துக்கறியாக்கி அவர் உடலை ஆராய முடிவு செய்கிறது.

MNUவிடம் இருந்து தப்பும் விக்கூஸ் நேராக டிஸ்ட்ரிக்ட்-9ஐ அடைகிறார். அங்கு கிறிஸ்டேபர் என்னும் வேற்றுக்கிரகவாசியின் மூலம் அவர் மேல் பட்ட அந்த திரவம் உண்மையில் வேற்றுக்கிரக விண்கலத்தை செலுத்த தேவையான எரிபொருள் என்று தெரிந்து கொள்கிறார். அந்த எரிபொருள் கிடைத்தால் கிறிஸ்டேபரும் பிற வேற்றுக்கிரகவாசிகளும் தங்கள் கிரகத்திற்கு திரும்ப முடியும் என்பதையும் தன்னால் சாதாரண மனிதனாக உருமாற முடியும் என்பதையும் அறிந்த விக்கூஸ், கிறிஸ்டேபரின் துணையோடு தற்போது MNU வசம் இருக்கும் அந்த எரிபொருளை கைப்பற்ற முடிவு செய்கிறார். விக்கூஸ் மற்றும் கிறிஸ்டேபரால் MNUவிடம் இருத்து அந்த எரிபொருளை மீட்க முடிந்ததா, வேற்றுக்கிரகவாசிகளால் தங்கள் தாய்கிரகத்திற்க்கு திரும்ப முடிந்ததா, விக்கூஸ் மீண்டும் மனித உருவம் கிடைத்ததா என்பது மீதிக்கதை.

வேற்றுக்கிரகவாசிகளைப் பற்றி இதற்கு முன் ஏகப்பட்ட படங்கள் வந்திருந்தாலும் அந்தப் படங்களில் இருந்து டிஸ்ட்ரிக்ட்-9ஐ வேறுபடுத்தி காட்டுவது இரண்டு விசயங்கள்

  • மற்ற படங்களில் வரும் வேற்றுக்கிரகவாசிகளின் நோக்கம் பூமியை கைப்பற்றுவதாக அல்லது அழிப்பதாக இருக்கும். விசேஷ சக்திகளும் நவீன ஆயுதங்களும் கொண்டிருக்கும் (என்க்குத் தெரிந்து ஸ்பீல்பெர்க்கின் ET ஒரு விதிவிலக்கு). இந்தப் படத்தில் அப்படி இல்லாமல் மனிதர்களிடம் உதை வாங்கும் இறால்களாக வருவது ஒரு வித்தியாசம்.
  • விளிம்பு நிலை மனிதர்களின் குறியீடாக வேற்றுக்கிரகவாசிகளை சித்தரித்திருப்பது. டிஸ்ட்ரிக்ட்-6 என்பது தென்னாப்பிரிக்க நகரமான கேப்டவுனில் இருந்த ஒரு குடியிருப்புப் பகுதி. 1970களில் இந்தப் பகுதியில் இருந்த வெள்ளையர் அல்லாத மக்கள் தென்னாப்பிரிக்க அரசினால் வேறு இடங்களுக்கு வலுக்கட்டாயமாக வெளியேற்றப்பட்டார்கள். இந்தப் படத்திற்க்கு டிஸ்ட்ரிக்ட்-9 என்று பெயரிட்டது டிஸ்ட்ரிக்ட்-6 நினைவாகத் தான்.

இந்த இரண்டு காரணங்களும் படத்தின் முதல் பாதியை 'அட வித்தியாசமான படமா இருக்கே!' என்று ரசிக்க வைக்கிறது. படத்தின் பிற்பகுதியோ சேஸிங், விக்கூஸின் ஹீரோயிசம், துப்பாக்கிச் சண்டை என்று மூன்றாம் தர ஹாலிவுட் பட ரேஞ்சுக்கு இருக்கிறது.

நீங்கள் வித்தியாசமான படங்களின் ரசிகர் என்றால் இந்தப் படத்தின் முதல் பாதியை மட்டும் பார்த்து விட்டு ஓடி வந்து விடுங்கள். இல்லை உங்களுக்கு ஆக்க்ஷன் காட்சிகள் தான் பிடிக்கும் என்றால், இரண்டாவது பாதி மட்டும் பாருங்கள் போதும்.

.

Saturday, 26 September 2009

குவாண்டின் டராண்டினோவின் இன்குளோரியஸ் பாஸ்டர்ட்ஸ் - எனது பார்வையில்


இன்குளோரியஸ் பாஸ்டர்ட்ஸ்

குவாண்டின் டராண்டினோ - நவீனத் திரையுலகில் தவிர்க்க முடியாத ஒரு பெயர். ரிசர்வாயர் டாக்ஸ் (Reservoir Dogs), பல்ப் பிக்க்ஷன் (Pulp Fiction), கில் பில் (Kill Bill) போன்ற திரைப்படங்களின் மூலம் முத்திரை பதித்த இவரின் புத்தம் புதிய வெளியீடு இன்குளோரியஸ் பாஸ்டர்ட்ஸ் (Inglourious Basterds) - படத்தலைப்பில் வலிய திணிக்கப்பட்ட எழுத்துப் பிழைகளில் ஆரம்பமாகும் குவாண்டினின் ஸ்டைல் படம் முழுவதும் தொடர்கிறது.

இரண்டாம் உலகப்போரில் ஜெர்மனியின் கை ஓங்கியிருக்கும் சமயம். ஜெர்மனியின் ஆதிக்கத்தில் இருக்கும் பிரான்சில் நடைபெறும் கதை. அங்கே உள்ள யூதர்களை தேடிப்பிடித்து தீர்த்து கட்டும் யூத வேட்டைக்காரன் (அட நம்ம விஜய் இல்லீங்க) நாஜிப் படையின் கர்னல் ஹான்ஸ் லான்டா. ஒரு கிராமத்தில் பதுங்கியிருக்கும் யூத குடும்பம் ஒன்றை முழுவதுமாக தீர்த்து கட்டுவதில் இருந்து படம் ஆரம்பமாகிறது. அதிலிருந்து தப்பிப்பது சூசன்னா என்ற ஒரே ஒரு இளம் பெண் மட்டுமே. இவள் சில வருடங்களுக்குப் பின் தனது யூத அடையாளங்களை மறைத்து விட்டு பாரீஸில் உள்ள ஒரு சிறிய திரையரங்கின் உரிமையாளராக உருமாறுகிறாள்.

இதற்கிடையில் அமெரிக்க இராணுவத்தில் பணிபுரியும் யூத வீரர்களை கொண்டு லெப்டினன்ட் அல்டோ என்பவனின் தலைமையில் "இன்குளோரியஸ் பாஸ்டர்ட்ஸ்" என்ற குழு அமைக்கப்படுகிறது (தமிழில் இப்படம் மொழி பெயர்க்கப்பட்டால் என்ன பெயர் சூட்டப்படு!?). முள்ளை முள்ளால் தான் எடுக்க முடியும், தீவிரவாதத்தை தீவிரவாதத்தால் தான் எதிர்க்க முடியும் என்பது இவர்களின் சித்தாந்தம். இவர்களின் பணி ஜெர்மானிய இராணுவத்தை போர்க்களத்தில் எதிர்ப்பது அல்ல. பதிலாக நாஜிக்களை கொடூரமாக கொன்று ஜெர்மானியர்களிடையே பீதியைக் கிளப்புவது. கொல்லப்பட்டவர்கள் தலையின் மேல்பாகத்தை ஞாபகார்த்தமாக வெட்டி எடுத்து வைத்துக் கொள்வது இவர்கள் ஸ்டைல் (குழுவில் உள்ள ஒவ்வொரு நபரும் குறைந்தது 100 தலை கொய்ய வேண்டும் என்பது இவர்களுக்கு அல்டோ கொடுக்கும் டார்கெட்). நாஜிக்களை குழுவாகக் கொல்லும் செயல் வெளியுலகிற்கு தெரிய வேண்டும் என்பதற்காக அக்குழுவில் இருந்து ஒரே ஒரு நபரை மட்டும் உயிரோடு விட்டு விடுவார்கள். அப்படி விடுவிக்கப்படும் நபரின் நெற்றியில் ஸ்வஸ்திகா சின்னம் கத்தியால் கீறப்படும், அந்நபரின் நாஜி அடையாளம் கடைசி வரை மறையாமல் இருக்க.

இந்தக் குழு தங்கள் பணியை செவ்வனே செய்து வரும் வேளையில் ஜெர்மனியின் பிரச்சார அமைச்சர் கோபெல்ஸ் (Joseph Goebbels) மேற்பார்வையில் ஜெர்மானிய வீரர்களின் சாகசத்தை விவரிக்கும் ஒரு பிரச்சாரத் திரைப்படம் உருவாகிறது. அத்திரைப்படத்தின் கதாநாயகனுக்கு சூசன்னா மீது ஒரு கண். இவன் வற்புறுத்தலின் பேரில் இப்படத்தை சூசன்னாவின் திரையரங்கில் வெளியிட கோபெல்ஸ் சம்மதிக்கிறார். இப்படத்தின் வெளியீட்டு விழாவில் பங்கேற்க ஹிட்லர், ஜெர்மனி விமானப்படையின் தளபதி கேரிங் (Hermann Göring), நாஜி கட்சியின் முக்கிய பிரமுகரான மார்டின் பொர்மன் (Martin Bormann) என்று நாஜி கட்சியின் பெரும் தலைகள் அனைவரும் பாரீசில் ஒன்று கூடுகின்றனர். இந்நிகழ்ச்சியின் பாதுகாப்பு ஏற்பாடுகள் யூத வேட்டைகாரனான ஹானிடம் ஒப்படைக்கப்படுகிறது. தன் குடும்பத்திற்கு நேர்ந்த கதிக்கு பழி வாங்கும் விதமாக, நிகழ்ச்சியின் போது திரையரங்குக்கு நெருப்பூட்டி மொத்த கூட்டத்தையும் கொளுத்த முடிவு செய்கிறாள் சூசனா.

இந்த நிகழ்ச்சியை பற்றி அறிந்து கொள்ளும் இங்கிலாந்து இராணுவமும் நாஜிக்களை திரையரங்கில் வைத்து மொத்தமாக அழிக்க முடிவெடுக்கிறது. இன்குளோரியஸ் பாஸ்டர்ட்ஸ் குழுவுடன் இணைந்து செயல்படும் திட்டத்துடன் இங்கிலாந்து வீரர்கள் பிரான்ஸில் இறங்குகிறார்கள். இவர்களுக்கு உதவ ஒரு அழகான உளவாளி நடிகையும் ஆஜர்.

இப்படி இரண்டு கோஷ்டிகளும் ஒரே காரியத்தை ஒரே நேரத்தில் செய்ய முடிவெடுக்கிறார்கள். இதனால் ஏதும் குழப்பம் ஏற்பட்டதா, எடுத்த காரியம் சுபமா, ஹிட்லரும் மற்ற நாஜிக்களும் என்ன ஆனார்கள், ஹானினால் தன் தலைவர்களை காப்பாற்ற முடிந்ததா போன்ற இதர விவரங்களை உங்கள் வசதிக்கேற்ப வெள்ளித்திரையிலோ, டிவிடியிலோ, டாரண்டிலோ காண்க!

படத்தில் அல்டோவாக வரும் பிராட் பிட், சூசன்னாவாக வரும் மெலானி, ஜெர்மானிய நடிகையாக வரும் டயான க்ரூகர் (ட்ராய் படத்தில் ஹெலனாக நடித்தவர்), நடிகனாக வரும் டேனியல் பூருஹெல் என அனைவரும் கச்சிதம். பிராட் பிட் தன்னை இத்தாலியராக காட்டிக் கொள்ளும் காட்சியில் காட்பாதர் பட மர்லின் பிரான்டோவை அப்பட்டமா காப்பி அடிக்க, தியேட்டரில் விசில் பறக்கிறது. ஆனால் வில்லன் ஹானாக வரும் கிறிஸ்டேப் வால்ட்ஸ் மற்ற அனைவரையும் இடது கையால் ஓரம் கட்டுகிறார். சுருக்கமாக சொன்னால் - அட்டகாசம். அங்கிளுக்கு ஒரு ஆஸ்கார் பார்சல்!

டராண்டினோவின் புகழ் பெற்ற நான்-லீனியர் பாணி இதில் கிடையாது. படம் உங்கள் மூளையை குடையாமல் சீராக நேர் கோட்டில் செல்கிறது. இப்படத்தை தன் மாஸ்டர் பீஸ் என்று சொன்னவர் தன் முத்திரையான நான்-லீனியர் திரைக்கதை உத்தியை குத்தாமல் விட்டது ஆச்சரியம் தான்.

டராண்டினோவின் படங்களில் தென்படும் மற்றுமொரு விசேஷம் - வன்முறை. ரிசர்வாயர் டாக்ஸ் படத்தில் வரும் அந்த காவலரின் காதறுக்கும் நேரடியான வன்முறை காட்சியானாலும் சரி, கில் பில் படத்தில் வரும் பகடி கலந்த கத்தி சண்டை காட்சியானாலும் சரி வன்முறை ரசிகர்களுக்கு சரியான விருந்து. இந்தப் படத்தில் வன்முறைக்கு ஏகப்பட்ட வாய்ப்புக்கள் இருந்தாலும் ஏனோ டராண்டினோ அடக்கியே வாசித்திருக்கிறார். நாஜி வீரன் ஒருவனை பேஸ்பால் மட்டையால் அடித்து நொறுக்கும் காட்சி மட்டுமே விதிவிலக்கு.

வசனமே இல்லாமல் ஆக்சன் படங்கள் வெளிவந்த காலகட்டத்தில் பக்கம் பக்கமாக வசனம் பேசும் பாத்திரங்களையும் நீண்ட உரையாடல்களையும் கொண்டு க்ரைம் / ஆக்க்ஷன் கதைகளைப் படைத்தவர் டராண்டினோ. ரிசர்வாயர் டாக்ஸ் படத்தில் வரும் மடோனா பாடல் மற்றும் உணவகத்தில் டிப்ஸ் கொடுப்பதை பற்றிய உரையாடல்கள், பல்ப் பிக்க்ஷன் படத்தில் சாமுவேல் ஜாக்சனின் புகழ் பெற்ற பைபிள் வாசகம் சொல்லிக் கொல்லும் வசனம் போன்றவை எத்தனை முறை கேட்டாலும் அலுக்காது, நம் திருவிளையாடல் திரைப்பட வசனத்தைப் போல! டராண்டினோவின் மற்ற படங்களை ஒப்பிடுகையில், இந்தப் படத்தில் வசனம் கொஞ்சம் சுமார் தான் என்றாலும் சில இடங்களில் டராண்டினோவின் டச் இல்லாமல் இல்லை. ஒரு உதாரணம்

மனதில் ஒன்று நினைத்துக் கொள்வேன், அது என்ன என்று நீ கண்டுபிடி என்பது போன்ற் ஒரு விளையாட்டின் போது வரும் வசனம்
முதல் நபர்: நான் காட்டுப் பகுதியில் இருந்து அமெரிக்கா சென்றவன் என்று கூறினாய். நான் போகும் போது படகில் சென்றேனா?
இரண்டாம் நபர்:
ஆம்

முதல் நபர்: என் விருப்பதிற்கு மாறாக இழுத்துச் செல்லப்பட்டேனா?
இரண்டாம் நபர்:
ஆம்

முதல் நபர்: படகில் செல்லும் போது சங்கிலியால் பிணைக்கப்பட்டிருந்தேனா?
இரண்டாம் நபர்:
ஆம்

முதல் நபர்:
நான் ஒரு நீக்ரோவா?

இரண்டாம் நபர்:
இல்லை

முதல் நபர்:
அப்படி என்றால் நான் கிங்காங்.
அதே போல் முதல் காட்சியில் பிரஞ்சு விவசாயியை ஹான் விசாரிக்கும் போது யூதர்களை எலிகளுக்கு ஒப்பிடும் வசனமும் நச்!

டராண்டினோ படங்களில் உள்ள மற்றுமொரு ஸ்பெஷாலிட்டி - பின்னணி இசைக்கு அவர் பயன்படுத்தும் பழைய பாடல்களும் ஆல்பம் இசைகளும் (Kill Bill - Twisted nerve, Woo Hoo. Pulp Fiction - Jungle Boogie, Son of a preacher man, Reservoir Dogs - Stuck in the middle). இதிலும் அப்படியே என்றாலும் மற்ற படங்கள் அளவிற்கு என்னை கவரவில்லை. Rabbia e Tarantella என்ற இராணுவ ட்ரம் பீட் மட்டுமே பிடித்தது. மேலும் சில முறை கேட்டால், மற்ற பாடல்களும் பிடிக்கலாம்!

ஆக, டராண்டினோவின் மற்ற படங்களுடன் ஒப்பிடும் போது நான்-லீனியர் தன்மை, வன்முறை, வசனம், பாடல் என்று அனைத்து தளங்களிலும் இது ஒரு படி கீழே தான். இருந்தாலும் டராண்டினோ ரசிகர்கள் தவற விடக்கூடாத படம். மற்றவர்களும் தான்.

Wednesday, 23 September 2009

பாட்டி வடை சுட்ட கதையும் என்னைப் போல் ஒருவனும்.

இன்று எனது மகனுக்காக வாங்கிய ஒரு கதைப் புத்தகத்தை புரட்டிக் கொண்டிருந்தேன். அதில் ஒரு குறிப்பிட்ட கதையை படித்ததும் அதிர்ந்து போனேன். இக்கதைகளை படிக்கும் பிஞ்சு மனதில் நஞ்சை விதைக்கும் ஒரே நோக்கத்துடன் படைக்கப்பட்ட கதை குப்பை அது. அதைப் படித்த போது ஏற்பட்ட மன உளைச்சல் கொஞ்ச நஞ்சமல்ல. இந்துத்துவம், பார்பனீயம், முதலாளித்துவம் என்று உலகில் உள்ள அனைத்து அயோக்கியத்தனத்தையும் ஒன்றாக கரைத்து வாசகர்களின் மேல் வாந்தியெடுப்பதை தவிர வேறு எந்த வித குறிக்கோளும் இல்லாத அந்த கதை இதோ இது தான்

ஒரு ஊரில் பாட்டி ஒருத்தி வடை சுட்டு விற்று வந்தாள். ஒரு நாள் அவ்வழியாக பறந்து வந்த காக்கா ஒன்று ஒரு வடையை தூக்கிக்கொண்டு பறந்து போய் மரக்கிளை ஒன்றில் உட்கார்ந்து கொண்டது. அந்த வழியாக வந்த நரி, வடையோடு காக்காவை பார்த்துவிட்டது; வடையைத் தான் எடுத்துக்கொள்ள ஒரு தந்திரம் செய்தது. காக்காவைப் பார்த்து காக்கா, நீ மிகவும் அழகாக இருக்கிறாய். உனக்கு குரலும் கூட அழகாக இருக்கக்கூடும், ஒரு பாட்டுப் பாடு என்றது. காக்கா தன் வாயைத் திறந்து "கா.. கா..." என்று பாட்டுப் பாடவே வாயிலிருந்த வடை கீழே விழுந்துவிட்டது. நரி வடையை கவ்வி எடுத்துக்கொண்டு போனது.

முதலில் பாட்டியை கவனிப்போம். ஒரு வயதான பெண்மணியை குறிப்பிட வேறு பல சொற்கள் இருக்கின்றன. ஆனாலும் இந்த கதையின் ஆரம்பம் முதல் முடிவு வரை இவள் "பாட்டி" என்றே அழைக்கப்படுகிறாள். கிழவி, ஆயா போன்ற நலிந்த, நசுக்கப்பட்ட மக்களின் பாஷையில் ஒரு முறை கூட குறிப்பிடப்படவில்லை. இவள் பாட்டியாக இருப்பதற்கும் கிழவியாக இல்லாமல் போனதற்கும் காரணம் ஒன்று தான் - இவள் ஆதிக்கசாதியின் பிரதிநிதி. இவள் எதற்காக வடை விற்க வேண்டும்? ஏன் சிக்கன் 65 அல்லது மட்டன் சுக்கா விற்கவில்லை என்று யோசித்துப் பார்த்தால் மேலும் பல படிமங்கள் புலப்படும்.

அடுத்தது காக்கா. உலகில் எத்தனையோ பறவைகள் இருக்க எதற்காக இந்த கதையில் காக்கா? ஏன் ஒரு கிளியோ, வெண்புறாவோ, அன்னமோ வடையை திருடவில்லை? காரணம் இல்லாமலில்லை. இந்து சாஸ்திரப்படி பிரம்மனின் காலில் இருந்து பிறந்தவன் சூத்திரன். காலில் அழுக்கு இருக்கும். அழுக்கு கருப்பாக இருக்கும். அதாவது பிரம்மனின் காலில் இருந்து பிறந்தவர்கள் கருப்பாக இருப்பார்கள். ஆக கருப்பான காகம் இங்கே சூத்திரனின் குறியீடு. ஒன்றும் ஒன்றும் ஒன்றும் ஒன்றும் நாலு என்ற சுலபமான கணக்கு தான் இதுவும். இந்த இடத்தில் முக்கியமாக கவனிக்க வேண்டிய மற்றுமொறு விசயம் இருக்கிறது. இந்த கதையில் ஒரு இடத்தில் கூட "காகம்" என்ற மரியாதை தொனிக்கும் சொற்பிரயோகம் கிடையாது. கதை முழுவதும் "காக்கா" என்ற மரியாதையற்ற வார்த்தை தான். பாட்டி கிழவியாக கூடாது. காக்கா காகம் ஆக முடியாது. இது தான் இவர்களின் தர்மம்.

இக்கதையில் வரும் நரி ஒரு புத்திசாலி. நல்ல வார்த்தைகளில் பேசும் ஒரு கனவான் தோற்றம் அதற்கு. மேலுக்கு நயவஞ்சகவாதி போல சித்தரிக்கப்பட்டாலும் உண்மை அதுவல்ல. அது பற்றி பிறகு பேசலாம்.

இத்தகைய பாத்திரப் படைப்புக்களின் இடையே இந்த கதையை கட்டுடைத்தால் நமக்கு நமக்கு மிஞ்சுவது கீழ் கண்ட வினாக்கள் தான்

1) இக்கதையில் காகம் கிழவியை ஏமாற்றியதை மட்டும் வெளிச்சம் போட்டு காட்டி விட்டு, கிழவி இன்று வரை மற்றவர்களை ஏமாற்றி வருவதை இருட்டடிப்பு செய்வது ஏன்? நேற்று சுட்ட ஊசிப் போன வடையை விற்கும் ஆயிரக்கணக்கான கிழவிகளை பற்றி பக்கம் பக்கமாக எழுத விசயங்கள் இருக்க, இந்த கதையில் அதைக் கண்டித்து ஒரே ஒரு வார்த்தை கூட இல்லையே?

2) கிழவியை ஏமாற்றிய காக்கைக்கு வடை பறி போனது தண்டனையாம். சரி நல்லது. காக்கையை ஏமாற்றிய நரிக்கு மட்டும் என்ன தண்டனை? கதையை முழுவதும் 12 தடவை படித்து விட்டேன், அது மட்டும் தெரியவில்லை. இளைத்தவன் என்றால் தண்டனை. தடித்தவனுக்கு புத்திசாலி பட்டமா?

3) நரி பாட சொன்னதாம் காக்கா உடனே வாயில் வடை இருப்பதையும் மறந்து பாடியதாம். உலகில் உள்ள அனைத்து காகங்களையும் முகஸ்துதிக்கு மயங்கும் முட்டாளாக சித்தரிப்பதைத் தவிர இந்த காட்சிக்கு வேறு என்ன பொருள் கொள்வது? முட்டாள் நரி இல்லையா? முட்டாள் பாட்டி இல்லையா? அது ஏன் காகம் மட்டும் முட்டாள்?

4) இந்த வரியை பாருங்கள் - "காக்கா தன் வாயைத் திறந்து "கா.. கா..." என்று பாட்டுப் பாட"
இந்த வரியில் தான் எவ்வளவு ஒரு ஆணவம் கலந்த அயோக்கியத்தனம்? காக்கையால் குயில் போல பாட முடியாமல் பரிதாபமாக "கா கா" என்று கத்துவதை கதையாக்கி கேலி செய்யும் அளவுக்கு வன்மம் தெரிக்கிறது. தியேட்டரில் சிரிக்கிறார்கள். இதற்குத்தானே ஆசைப்பட்டாய் மணிவண்ணா?

பி.கு: எதையும் நேர் கோட்டில் பார்த்தால் முற்போக்குவாதி கிடையாதாம். அதான் ஒரு 42 டிகிரி கோணத்தில் இருந்து பார்த்தேன். இப்பொ நானும் முற்போக்குவியாதி தான். அப்போ நீங்க?

Monday, 1 June 2009

மனம் போன போக்கிலே... (01/06/2009)

கிரிக்கெட்டில் ஒரு ஆட்டக்காரர் 25 ஓட்டங்கள் எடுத்தால் அவரை தலை மீது தூக்கி வைத்து ஆடுகிறார்கள். ஒரு திரைப்படம் 25 நாட்கள் ஓடிவிட்டால் திரையரங்கில் கும்பாபிஷேகமே நடக்கிறது. தேர்தலில் 25 இடங்களில் வென்றால் வரலாறு காணாத வெற்றி என்று ஊரெங்கும் போஸ்டர். கிரிக்கெட்டுக்கும் சினிமாவிற்கும் அரசியலுக்கும் கிடைக்கும் மரியாதையில் அயிரத்தில் ஒரு பங்கு கூட இலக்கியத்துக்கு கிடையாது. ஒரு எழுத்தாளன் பதிவெழுத வந்த இருபதே மாதங்களுக்குள் 25 பதிவுகள் எழுதி இருக்கிறானே அதை பாராட்டி ஒரு விருது, சரி வேண்டாம், அட்லீஸ்ட் ஒரு விழா? அட அது கூட தேவையில்லை, போன பதிவைப் படித்த லட்சக்கணக்கான வாசகர்களில் ஒரே ஒருவராவது நாலு வார்த்தை பாராட்டி ஒரு பின்னூட்டம் போட்டு இருக்கலாம் அல்லவா? ம்ஹும் ஒரு புண்ணாக்கும் கிடையாது. வருகிற கோபத்திற்கு சூடாக ஒரு மசால் தோசை சாப்பிட்டு விட்டு பூன் மொழியில் பதிவெழுதலாம் என்று இருக்கிறேன்.

++++++++++++++++++++++++

ஒரு எழுத்தாளனின் தரத்தை நிர்ணயிக்க பின்னூட்டங்களின் எண்ணிக்கைகள் சரியான தராசு அல்ல என்ற கருத்தில் நான் தெளிவாகவே இருக்கிறேன். நல்ல வாசகர்கள் கடிதம் எழுதுகிற ரகம் இல்லை என்றார் சுஜாதா. பின்னூட்டங்களுக்கும் அது பொருந்தும். மேலே சொன்ன மாதிரி பூன் மொழியில் பதிவெழுதாமல் இன்னுமும் தமிழில் தொடர்ந்து எழுதக் காரணம் என்னை விடாமல் படித்து வரும் வாசகர்களை ஏமாற்றக் கூடாது என்ற காரணத்தினால் தான். சென்ற வாரம் என் பதிவுகளுக்கு சப்ஸ்க்ரைப் செய்த என் நாலு வயது மகனையும் சேர்த்து இதுவரை மொத்தம் ஆறு பேர் என் பதிவுகளை கூகிள் ரீடரில் இணைத்திருக்கிறார்கள். இவர்கள் அனைவருக்கும் என் வந்தனம். இந்த ஆறு பேரில் நான் மட்டுமே வெவ்வேறு கூகிள் அக்கவுண்டுகளின் மூலம் இரண்டு முறை சப்ஸ்க்ரைப் செய்திருக்கிறேன். இது தவிர என் மனைவி, என் மகன் மற்றும் கூகிள் ரீடரை எப்படி உபயோகிப்பது என்று டெஸ்ட் செய்ய (மட்டும்) என் பதிவை இணைத்த என் தோழி ஆகிய ஐந்து பேரை கழித்து விட்டு பார்த்தாலும் இது பெரிய சாதனை தான். இப்பொழுது எனக்கு இருப்பதெல்லாம் ஒரே ஒரு கேள்வி மட்டும் தான் - யார் அந்த ஆறாவது நபர்?

பிற்சேர்க்கை: ஆச்சரியம்! இந்த பதிவை வெளியிட்ட சிறிது நேரத்திற்குள்ளாகவே சப்ஸ்க்ரைப் செய்தவர்களின் எண்ணிக்கை எழாக உயர்ந்திருக்கிறது! இப்பொழுது எனக்கு இருப்பதெல்லாம் இரண்டு கேள்விகள் மட்டுமே
1) யார் அந்த ஆறாவது நபர்?
2) யார் அந்த ஏழாவது நபர்?

++++++++++++++++++++++++

ஒருவருக்கொருவர் அடித்துக் கொள்வது தான் இலக்கியவாதிகளின் முக்கிய அடையாளம் என்ற அளவுகோலின் படி பார்த்தால், பதிவுலகில் எழுதி வரும் இலக்கியவாதிகளின் எண்ணிக்கை அதிகரித்திருக்கிறது என்பது நிச்சயம். யாரெல்லாம் 'தெருப் பொறுக்கி' எழுத்தாளர்கள் என்று தெளிவாக தெரியாத வரையில் பதிவர் கூட்டங்களில் கலந்து கொள்வதை தவிர்ப்பது நல்லது என்று தோன்றுகிறது. மீறி கலந்து கொண்டால் கோஷ்டி சண்டையின் நடுவே சிக்கி மண்டை உடைபடலாம். எச்சரிக்கை!

பை தி வே, இலக்கியம் பொழுதுபோக்கல்ல என்று யார் சொன்னது?

++++++++++++++++++++++++

இந்த பதிவு முழுவதும் இலக்கியம், இலக்கியவியாதிகள் என்று கொஞ்சம் சீரியசாகவே போய் விட்டதால் லைட் வெயிட்டாக வேறு விசயம் ஏதாவது பேசலாமா? டான் பிரவுனின் (Dan Brown) புகழ் பெற்ற 'The Da Vinci Code' நாவலை விட அவரின் முந்தைய நாவலான 'Angels and Demons' எனக்கு கொஞ்சமே கொஞ்சம் அதிகம் பிடித்திருந்த காரணத்தினால் சென்ற வாரம் அந்தப் படத்தைப் பார்த்தேன். நாவலுக்கும், திரைக்கதைக்கும் இடையே நிறையவே மாற்றங்கள். உதாரணம் - கதையில் வரும் முக்கிய கதாபாத்திரமான CERN நிறுவனத்தின் தலைமை அதிகாரி படத்தில் இல்லை. படத்தின் பிற்பகுதியிலும் ஏகப்பட்ட மாற்றங்கள். இவை அத்தனையும் தாண்டி, படம் பெருத்த ஏமாற்றத்தையே அளித்தது. இதற்கு பேசாமல் ஸ்டார் டிரக் (Star Trek) போயிருக்கலாம்.

++++++++++++++++++++++++

Thursday, 9 April 2009

மனம் போன போக்கிலே... (15/04/2009)

மூன்று வாரம் விடுமுறையில் இந்தியா செல்லலாம் என்று முடிவெடுத்ததுமே விஜய் மல்லையாவின் ரசனையின் மீது மிகுந்த நம்பிக்கை வைத்து கிங் பிஷர் ஏர்லைன்ஸை தேர்ந்தெடுத்தேன். சிறிது ஏமாந்து தான் போனேன். லண்டன்-பெங்களூரு விமானத்தில் இருந்த பணிப்பெண்களை விட பெங்களூரு-மதுரை விமானத்தில் இருந்த பெண்கள் பரவாயில்லை. மல்லையாவிற்கு மெயில் அனுப்பி இருக்கிறேன், பார்த்து சரி செய்தால் சந்தோஷம்.

+++++++++++++++++++++++++++++++++

நான் பார்த்த வரையில் தேசிய நெடுஞ்சாலைகளின் தரத்தில் நல்ல முன்னேற்றம். பெரும்பாலும் நாலு தடங்கள், சில இடங்களில் ஆறு! ஆனால் இருக்கும் நாலு தடங்களில் இடதுபுறம் இருக்கும் இரண்டு போவதற்கு, வலதுபுறம் இருக்கும் இரண்டு வருவதற்கு என்று ஓட்டுனர்களுக்கு யாரவது சொன்னால் பரவாயில்லை. அனைத்து தடங்களிலும் வருகிறார்கள் அனைத்து தடங்களிலும் போகிறார்கள். இவர்கள் இப்படி ஓட்டும் வரை நாலு என்ன நாற்பது தடங்கள் அமைத்தாலும் உபயோகம் லேது.

+++++++++++++++++++++++++++++++++

மதுரை, கோவில்பட்டி, சிவகாசி உள்ளிட்ட ஊர்களில் ஒரு அற்புதக் காட்சியை கண்டேன். வயது வித்தியசம் இல்லாமல் பெரும்பாலான மக்களின் கையில் ஒரு டென்னிஸ் மட்டை! ஆகா தமிழகத்தில் விளையாட்டு ஆர்வம் அதிகமாகிவிட்டது. வரவேற்கத்தக்க மாற்றம் தான் என கொஞ்ச நேரம் சந்தோஷப்பட்டேன். பிறகு தான் தெரிந்தது அது டென்னிஸ் மட்டை கிடையாது என்பது. கொஞ்ச நேரம் கரன்டில் சார்ஜ் செய்து விட்டு அடித்தால் கொசு எல்லாம் 100% செத்து விழும் என்ற உத்திரவாதத்துடன் ISI CSI முத்திரை குத்தி வரும் கொசு அடிக்கும் கருவியாம்! (CSI -> Chinese Standards Institution)

+++++++++++++++++++++++++++++++++

இந்த பயணத்தின் போது சில பதிவர்களை நேரில் சந்திக்க வேண்டும் என்று எண்ணியிருந்தேன். திட்டமிட்டபடி கொங்கு நாடு செல்ல முடியாததால் பரிசல், செல்வேந்திரன், லதானந்த் அங்கிள், வெயிலான், வால்பையன் ஆகியோரை சந்திக்க முடியவில்லை. மதுரையில் இருந்த 10 நாட்களில் சீனா அய்யா, தருமி அய்யா ஆகியோரையாவது பார்த்துப் பேசி இருக்கலாம். விதி செய்த சதியால் இந்தியாவில் இருந்த மூன்று வாரமும் இணையத்தின் பக்கம் திரும்பக் கூட முடியாத அளவிற்கு அலைச்சல். அடுத்த முறை வரும் பொழுது கண்டிப்பாக...

+++++++++++++++++++++++++++++++++

பெங்களூருல் புதிய விமான நிலையம் ஊருக்கு வெளியே சிறியதாக அழகாக இருக்கிறது. விமான நிலையத்தில் இருந்து பொம்மனஹல்லி செல்ல டாக்ஸி பிடிக்கலாம் என்று கட்டணம் கேட்டதும் என் முடிவை மாற்றிக் கொண்டேன். அடுத்த விமானம் பிடித்து மதுரை வந்து, மதுரையில் இருந்து ட்ரெயின் ஏறி, பெங்களூர் கண்டோன்மென்டில் இறங்கி டாக்ஸி பிடித்து பொம்மனஹல்லி போய் சேர்ந்தேன். நேரம் அதிகம் ஆனாலும் செலவு கம்மி!

+++++++++++++++++++++++++++++++++

பணிப்பெண்கள் விசயத்தில் சொதப்பினாலும் தலைக்கு 45 கிலோ லக்கேஜ் எடுத்து செல்ல அனுமதி அளித்த காரணத்தால் கிங் பிஷருக்கு ஒரு ஓ! நல்ல "கனமான" புத்தகங்களாக அள்ளிக் கொண்டு வந்து விட்டேன்.
வாங்கியதில் சில - சுஜாதாவின் தேர்ந்தெடுத்த சிறுகதைகள் ( 2 தொகுதிகள்) ,விஞ்ஞானச் சிறுகதைகள், எஸ். ராமகிருஷ்ணனின் உபபாண்டவம், ப. சிங்காரத்தின் புயலிலே ஒரு தோணி, சாருவின் ஸீரோ டிகிரி, மருதனின் விடுதலைப் புலிகள், இந்தியப் பிரிவினை: உதிரத்தால் ஒரு கோடு, செல்லமுத்து குப்புசாமியின் பிரபாகரன்: ஒரு வாழ்க்கை, Prodigyயில் இருந்து ஏழு புத்தகங்கள். இது தவிர முன்னமே வாங்கி பாதி படித்தும் படிக்காமலும் வைத்திருந்த சில புத்தகங்களையும் தூக்கிக் கொண்டு வந்தாகி விட்டது (சிலப்பதிகாரம் ஓர் எளிய அறிமுகம், புறநானூறு ஓர் எளிய அறிமுகம், கதாவிலாசம், இந்திரா பார்த்தசாரதியின் சில புத்தகங்கள் இன்ன பிற).

கிங் பிஷர் கொடுத்த 45 கிலோவில் 37 கிலோ இதற்கே சரியாகிப் போனது. மீதம் 8 கிலோவில் அடைத்துக் கொண்டு வந்த அப்பளம், மோர் மிளகாய், மாவடு, மசாலாப் பொடியை வைத்து அடுத்த பயணம் வரை காலம் கழிக்க வேண்டும். யாராவது லண்டன் பக்கம் வந்தால் சொல்லுங்கள். கொஞ்சம் சமையல் பொருட்கள் தேவைப்படுகிறது. அப்படியே கொஞ்சம் புத்தகங்களும் :)

+++++++++++++++++++++++++++++++++

இது வரை இங்கு கொண்டு வந்த புத்தகங்களையும் திரைப்பட டி.வி.டிகளையும் பார்த்தாலே தலை சுத்துகிறது. மொத்தமாக இந்தியா திரும்ப வேண்டிய நிலை வந்தால் ஒரு சரக்குக் கப்பலே தேவைப்படும். சின்னதாக ஒரு சரக்குக் கப்பல் என்ன விலையாகும் என்று யாருக்காவது தெரியுமா?

+++++++++++++++++++++++++++++++++

சரக்கடிப்பவர்கள் கிங் பிஷர் பெயரைப் பார்த்து அதிகம் ஆசைப்பட்டு ஏறி ஏமாற வேண்டாம். முதல் ரவுண்டு வோட்காவில் கொஞ்சம் ஆரஞ்சு ஜூஸ் கலந்து கொடுத்தார்கள். இரண்டாவது ரவுண்டில் ஆரஞ்சு ஜூஸில் கொஞ்சம் வோட்கா. மூன்றாவது நாலாவது ரவுண்டு எல்லாம் வெறும் ஆரஞ்சு ஜூஸு மட்டும் தான். கொடுமை! :(

Wednesday, 8 April 2009

அமுக்கான் (எ) அமுக்குப் பேய் (எ) Sleeping Paralysis


லதானந்த் அங்கிள் அமுக்கான்னு ஒரு பதிவு போட்டு சிரியஸா இல்லாம சீரியஸா பதில் சொல்ல சொல்லி இருக்காரு. அவரு (தனியா) தூங்கிகிட்டு இருக்கும் போது யாரோ அமுக்குற மாதிரி இருக்காம். கைய கால அசைக்க முடியாம அதலபாதாளத்துக்குள்ளாற விழுகுற மாதிரி ஒரே பீலிங்ஸாம். ரொம்பவே பயந்துட்ட மாதிரி தெரியுது.

எங்க ஊரு பக்கம் இதுக்கு பேரு 'அமுக்குப் பேய்'. அலோபதி மருத்துவத்துல இத Sleeping paralysis-ன்னு சொல்லுவாங்க. இந்த அனுபவம் எல்லோருக்கும் ஒரு தடவையாவது வந்திருக்கும்னு சொல்லுறாங்க. உங்களுக்கு இது வரைக்கும் இந்த அனுபவம் வந்தது இல்லைன்னா ஒன்னு நீங்க ரொம்ப சின்ன புள்ளைன்னு அர்த்தம். இல்லாட்டி போனா பேய் அமுக்குறது கூட தெரியாம நீங்க ஓவர் மப்புல தூங்குறீங்கன்னு அர்த்தம்.


இந்த பேய் ஏன் வருதுன்னு பார்க்கலாம். பொதுவா நீங்க தூக்கத்துல இருந்து எழுந்திருக்கும் போது உங்க மூளை உடம்பு ரெண்டும் ஒரே நேரத்துல எழுந்திரிக்கனும். ஆனா சில சமயம் மூளை சுறுசுறுப்பா எழுந்த பிறகும் உடம்பு மட்டும் சோம்பேறித்தனமா படுத்துக்கிட்டே இருக்கும். மூளைய பொருத்த வரைக்கும் உங்களுக்கு முழிப்பு வந்தாச்சு ஆனா உங்க மத்த புலன்கள் எல்லாம் இன்னும் முழிக்காததால மூளை தர்ற சிக்னல் எதுவும் உங்க உடம்புக்கு எட்டாது. உங்க மூளை ஆணையிட்டாலும், மனசு ஆசைப்பட்டாலும் உங்களால கை, கால், மூக்கு, முடி எதையுமே அசைக்க முடியாது. என்னடா நான் கைய தூக்க சொல்லி ஆர்டர் போட்டும் இந்த கை சும்மாவே இருக்கேன்னு மூளையும் கொஞ்சம் குழம்பிப் போயிடும். அந்த மாதிரி நேரத்துல நீங்க சின்ன வயசுல படிச்ச திகில் கதை எல்லாம் உங்க மூளைக்கு ஞாபகம் வந்து...அமுக்குப் பேய்!

சரி இந்த மூளையும் உடம்பும் வேற வேற நேரத்துல எந்திரிக்க என்ன காரணம்? அது இன்னும் யாருக்கும் சரியா தெரியலை. ஒழுங்கில்லாத தூக்கம், மனச்சுமை, புது சூழ்நிலை இது மாதிரி வெண்டைக்காய விளக்கெண்ணைல முக்கி எடுத்த மாதிரி காரணம் சொல்லுறாங்க. நீங்க கைய கால அசைக்காம நல்ல ட்ரீம் அடிச்சிக்கிட்டு இருக்க சொல்ல, டமால்னு முழிப்பு வருதுன்னு வச்சிக்கோங்க, உங்க உணர்ச்சி எல்லாம் திரும்பிடும். ஆனா உங்க மூளையில ஒரு பார்ட் மட்டும் இது வெறும் கனவு தான், இதுக்கு போயி எதுக்கு கைய கால ஆட்டிக்கிட்டு கம்முன்னு கிடன்னு உடம்புக்கு ஆர்டர் போடுறதும் ஒரு காரணம்னு ஆராய்ஞ்சி பிரிச்சி மேஞ்சி கண்டுபிடிச்சி இருக்காங்க.

இந்த பிரச்சனை அடிக்கடி வந்தா, இனிமே மல்லாக்க படுக்காம குப்பற படுங்க. அமுக்கான் வர்றது குறையும்.